“नवा चेहरा, पक्का विकास!” – भिकनभाऊंच्या जनसंपर्काने कॉलनी दुमदुमली

निवडणूक प्रक्रिया सुरू झाली असून सध्या उमेदवारी अर्ज भरणे सुरू आहे. मात्र, प्रभाग क्रमांक ७ मधील गणेश कॉलनी परिसरात आजच निवडणुकीचा माहोल तयार झाल्याचे चित्र पाहायला मिळाले. “टीका नको, विकास हवा” आणि “चेहरा नवा, विकास हवा” अशी खणखणीत भूमिका घेऊन लोकांमध्ये मिसळणारे समाजसेवक श्री. भिकन मुरलीधर हिवराळे यांनी आज गणेश कॉलनीत ‘घर-टू-घर जनसंपर्क’ करत नागरिकांच्या सदिच्छा भेटी घेतल्या. यावेळी नागरिकांनी उत्स्फूर्त गर्दी करत भिकनभाऊंचे जंगी स्वागत केले.

गणेश कॉलनीत परिवर्तनाची लाट:
गेल्या अनेक वर्षांपासून रखडलेले प्रश्न, खराब रस्ते आणि अस्वच्छता यामुळे त्रस्त असलेल्या गणेश कॉलनीकरांनी आता ‘बदलाचा’ निर्धार केला आहे. भिकनभाऊ आज नागरिकांच्या भेटीगाठी घेण्यासाठी कॉलनीत पोहोचताच, “आम्हाला जुन्या आश्वासनांची गरज नाही, आता आम्हाला सुशिक्षित आणि काम करणारा ‘नवा चेहरा’ हवा आहे,” अशा भावना नागरिकांनी व्यक्त केल्या.

घरोघरी ‘भाऊ’ म्हणून स्वागत:
भिकनभाऊंच्या या संपर्क दौऱ्यात कृत्रिम गर्दी नव्हती, तर लोकांचे प्रेम दिसत होते. अनेक घरांमध्ये सुवासिनींनी भिकनभाऊंचे स्वागत केले. “आमच्या समस्या सोडवण्यासाठी आता तुझाच आधार आहे,” असे म्हणत ज्येष्ठ नागरिकांनी त्यांच्या पाठीवर शाबासकीची थाप दिली. हा ‘प्रचार’ नसून आपल्या माणसाशी साधलेला ‘संवाद’ असल्याचे यावेळी दिसून आले.”भिकनभाऊ आगे बढो…” च्या घोषणांनी गणेश कॉलनी परिसर दुमदुमून गेला होता. त्यांची ‘विकासाची ब्लूप्रिंट’ अभ्यासपूर्ण असल्याने, कॉलनीतील उच्चशिक्षित तरुण वर्ग उमेदवारी अर्ज भरण्यापूर्वीच त्यांच्या पाठीशी खंबीरपणे उभा राहिला आहे.

काय म्हणाले भिकनभाऊ?
नागरिकांच्या या प्रचंड प्रतिसादाने भारावून गेलेले भिकनभाऊ म्हणाले, “सध्या उमेदवारी अर्ज भरण्याची लगबग सुरू आहे, पण त्याआधी माझ्या कुटुंबाला म्हणजेच मतदारांना भेटणे मला महत्त्वाचे वाटते. गणेश कॉलनीने मला जो पाठिंबा दिला आहे, तो पाहून माझी जबाबदारी वाढली आहे. मी तुम्हाला शब्द देतो की, ‘चेहरा नवा’ असला तरी ‘काम’ मात्र अनुभवी नेत्यापेक्षा दसपट वेगाने करून दाखवेन. जनसंपर्काचा हा ‘झंझावात’ आता थांबणार नाही.”
या सदिच्छा दौऱ्यात शिवकॉलनी परिसर मित्र मंडळाचे पदाधिकारी आणि गणेश कॉलनीतील रहिवासी मोठ्या संख्येने सहभागी झाले होते.