जळगाव महापालिकेत ‘राजूमामा’ पर्वाचा उदय; ४६ पैकी ४६ जागांवर विजयाचा ऐतिहासिक ‘क्लीन स्वीप’

जळगाव: जळगाव शहराच्या राजकीय इतिहासात सुवर्णाक्षरांनी लिहावा असा निकाल नुकत्याच पार पडलेल्या महापालिका निवडणुकीत लागला आहे. भारतीय जनता पार्टीने आमदार राजूमामा भोळे यांच्या नेतृत्वाखाली ४६ पैकी ४६ जागा जिंकून केवळ विजयच मिळवला नाही, तर विरोधकांचे अस्तित्वच पुसून टाकले आहे. जळगाव शहरावर गेल्या काही वर्षांपासून असलेली आमदार भोळे यांची राजकीय आणि प्रशासकीय पकड या निकालातून अधोरेखित झाली असून, ‘शत-प्रतिशत भाजपा’चा नारा येथे खऱ्या अर्थाने प्रत्यक्षात आला आहे.

कर्जमुक्ती आणि प्रशासकीय सुधारणांचा विजय २०१४ पूर्वी जळगाव महापालिका ‘हुडको’ (HUDCO) कर्जाच्या आणि आर्थिक गैरव्यवस्थापनाच्या ओझ्याखाली दबलेली होती. शहराचा विकास ठप्प झाला होता आणि नागरिक मुलभूत सुविधांपासून वंचित होते. अशा आव्हानात्मक परिस्थितीत आमदार राजूमामा भोळे यांनी शहराची धुरा सांभाळली. त्यांनी केवळ आश्वासने न देता, प्रशासकीय स्तरावर सातत्याने पाठपुरावा करून महापालिकेला कर्जमुक्त केले. महसूल आणि नगरविकास खात्याशी योग्य समन्वय साधून त्यांनी शहरासाठी निधी खेचून आणला. नवीन एमआयडीसी (MIDC) ची मंजुरी मिळवून रोजगाराच्या संधी उपलब्ध करणे आणि दोन भव्य उड्डाणपुलांच्या माध्यमातून शहराची वाहतूक कोंडी फोडणे, हे त्यांच्या ‘व्हिजन’चे द्योतक ठरले. बायपास आणि समांतर रस्त्यांच्या कामांमुळे जळगावच्या विस्ताराला गती मिळाली. या विकासाभिमुख राजकारणाची पोचपावतीच मतदारांनी या एकहाती विजयाद्वारे दिली आहे.

‘वन मॅन आर्मी’: राजकीय रणनीतीचा विजय या निवडणुकीचे विश्लेषण केल्यास असे दिसून येते की, हा विजय पूर्णतः आमदार भोळे यांच्या सूक्ष्म नियोजनाचा (Micro-management) आणि जनसंपर्काचा आहे. जिल्ह्यातील भाजपचे इतर दिग्गज नेते आपापल्या जबाबदाऱ्यांमध्ये किंवा इतर जिल्ह्यांत व्यस्त असताना, राजूमामांनी संपूर्ण जळगाव शहराच्या प्रचाराची धुरा आपल्या खांद्यावर घेतली. त्यांची कार्यपद्धती पारंपारिक नेत्यांपेक्षा वेगळी ठरली. पहाटेच्या मॉर्निंग वॉकपासून सुरू होणारा त्यांचा जनसंपर्क रात्री उशिरापर्यंत अविरत सुरू राहिला. ‘मी लोकप्रतिनिधी म्हणून नाही, तर तुमच्या कुटुंबाचा सदस्य म्हणून आलो आहे,’ ही त्यांची भूमिका जळगावकरांना भावली. प्रभागातील तिकीट वाटपापासून ते बुथ रचनेपर्यंत (Booth Management) त्यांनी जातीने लक्ष घातले, ज्याचे रूपांतर आज ४६-० अशा ऐतिहासिक निकालात झाले आहे.

विश्वासार्हता आणि सामाजिक बांधीलकी गेल्या ११ वर्षांत राजूमामा भोळे यांनी सूडाचे राजकारण न करता, विकासाचे राजकारण केले. समोरची व्यक्ती कोणत्याही पक्षाची असो, तिचे काम अडवून न ठेवता ते मार्गी लावण्याची त्यांची कार्यशैली प्रशासकीय वर्तुळातही वाखाणली जाते. जाती-पातीच्या समीकरणांना छेद देत त्यांनी ‘सर्वसमावेशक नेतृत्व’ उभे केले. त्यामुळेच तरुणांपासून ते ज्येष्ठांपर्यंत एक मोठा चाहता वर्ग त्यांच्या पाठीशी उभा राहिला.

जळगावचा ‘डबल इंजिन’ वेग विधानसभा निवडणुकीनंतर महापालिकेत मिळालेले हे यश जळगावच्या विकासाला ‘बूस्टर डोस’ ठरणार आहे. महापालिकेत आता भाजपचे निर्विवाद वर्चस्व असल्याने, ठराव मंजूर करणे, निविदा प्रक्रिया राबवणे आणि धोरणात्मक निर्णय घेणे अधिक जलद गतीने होईल. या विजयानंतर प्रतिक्रिया देताना आमदार राजूमामा भोळे यांनी स्पष्ट केले की, “शहरातील प्रत्येक गल्लीत विकासाची गंगा पोहोचवणे आणि जळगावला औद्योगिकदृष्ट्या सक्षम करून प्रत्येक हाताला रोजगार देणे, हेच माझे आताचे ध्येय आहे.” हा विजय म्हणजे जळगावच्या जनतेने त्यांच्या नेतृत्वावर टाकलेला अतुट विश्वास आहे, असेच म्हणावे लागेल.