जळगाव महापालिका रणसंग्राम: १० वर्षांपूर्वी ‘सील’ झालेली महापालिका ते विकासाची ‘सिक्की’; आ. सुरेश भोळेंनी मांडला महायुतीचा ‘संकल्प’

विशेष प्रतिनिधी | जळगाव

येत्या १५ जानेवारी २०२६ रोजी होऊ घातलेल्या जळगाव शहर महानगरपालिकेच्या निवडणुकीच्या पार्श्वभूमीवर, महायुतीने आज आपला ‘सिद्धी आणि संकल्प वचननामा’ जाहीर करत प्रचारात मोठी आघाडी घेतली आहे. १० वर्षांपूर्वी जळगाव शहरावर असलेल्या कर्जाचा डोंगर आणि प्रशासकीय अनास्था यांचा पाढा वाचत, “केवळ महायुतीच शहराला विकासाच्या मुख्य प्रवाहात ठेवू शकते,” असा दावा महायुतीचे निवडणूक प्रमुख आणि आमदार सुरेश (राजूमामा) भोळे यांनी केला आहे.

‘ते’ दिवस आठवा: कर्जाचा डोंगर आणि सील झालेली खाती महायुतीने प्रसिद्ध केलेल्या आवाहनात शहराच्या १० वर्षांपूर्वीच्या स्थितीचा अत्यंत गंभीर उल्लेख करण्यात आला आहे. महापालिकेची बँक खाती सील करण्यात आली होती आणि शहरावर कर्जाचा प्रचंड बोजा होता, याकडे लक्ष वेधण्यात आले आहे. आमदार सुरेश भोळे यांनी म्हटले की, “सर्वप्रथम आमदार झाल्यानंतर आर्थिक शिस्तीतून आणि प्रशासनाला विश्वासात घेऊन आम्ही जिल्हा बँकेचे कर्ज फेडले. सरकारदरबारी पाठपुरावा करून कर्जाची रक्कम कमी करून घेतली.” यामध्ये तत्कालीन मुख्यमंत्री देवेंद्र फडणवीस आणि पालकमंत्री गिरीश महाजन, तसेच विद्यमान पालकमंत्री ना. गुलाबराव पाटील यांच्या सहकार्याचा विशेष उल्लेख करण्यात आला आहे.

मर्यादित उत्पन्न आणि निधीचा ओघ शहराच्या उत्पन्नाचे स्रोत मर्यादित असल्याने पायाभूत सुविधांसाठी मनपाचा निधी अपुरा पडत होता, ही वस्तुस्थिती महायुतीने मान्य केली आहे. मात्र, यावर उपाय म्हणून राज्याचे उपमुख्यमंत्री देवेंद्र फडणवीस यांनी वेळोवेळी मोठा निधी उपलब्ध करून दिला आणि पालकमंत्री गुलाबराव पाटील यांनी जिल्हा नियोजन मंडळातून (DPDC) निधी दिल्याने शहरात रस्ते कॉंक्रिटीकरण आणि पाणीपुरवठ्याची कामे मार्गी लागल्याचा दावा करण्यात आला आहे.

विकासासाठी ‘एकाच विचारांची सत्ता’ हवी विरोधकांच्या टीकेला उत्तर देताना, “टीका-टिप्पणी करण्यापेक्षा आम्ही कामावर लक्ष देतो,” असा टोला महायुतीने लगावला आहे. शहराच्या विकासाचा अनुशेष भरून काढायचा असेल, तर दिल्ली, राज्य आणि शहरात एकाच विचारांची सत्ता असणे आवश्यक आहे, जेणेकरून विकास कामे गतिमान होतील, असे आवाहन मतदारांना करण्यात आले आहे.

शहरातील रस्ते, पाणी आणि दिवाबत्ती या मूलभूत प्रश्नांवर भर देत, महायुतीने ‘कमळ, धनुष्यबाण आणि घड्याळ’ या चिन्हांना मतदान करण्याचे आवाहन केले आहे. १० वर्षांपूर्वीची प्रशासकीय आणीबाणी आणि आताची विकासकामे यांची तुलना करून मतदारांना साद घालण्याचा हा प्रयत्न किती यशस्वी होतो, हे १५ जानेवारीला स्पष्ट होईल.