भुसावळ तालुका पोलिस ठाणे हद्दीत भररस्त्यात २५ लाख ४२ हजार रुपयांची रस्तालूट!

भुसावळ शहरात मंगळवारी (दि. २८) रात्री अत्यंत थरारक असा रस्तालुटीचा प्रकार घडला. खडका रोडवरील सत्यसाई नगर परिसरात, माजी नगरसेवक मुन्ना तेली यांच्याकडील कर्मचारी मोहंमद यासिन मोहंमद इस्माईल (वय ३९) यांच्याजवळून तब्बल २५ लाख ४२ हजार रुपयांची रोकड तिघा लुटारूंनी हिसकावून पोबारा केला. अवघ्या पाच मिनिटांत घडलेल्या या जबर गुन्ह्याने भुसावळ तालुका व शहरात कायदा व सुव्यवस्थेवर मोठे प्रश्नचिन्ह निर्माण झाले आहे.

तालुका पोलिसांच्या गस्तीवर प्रश्नचिन्ह: रात्री ‘बीट मार्शल’ नेमके कुठे होते?

भुसावळ तालुका पोलिस ठाण्याच्या हद्दीत खडका रोडवर रात्री १०.३० वाजताच्या सुमारास एवढी मोठी रस्तालुटीची घटना घडणे, हे तालुका पोलिसांच्या रात्रीच्या गस्त व्यवस्थेचे सपशेल अपयश दर्शवते.

• प्रश्न उपस्थित होतो: रात्री १०.३० वाजता भुसावळ तालुका हद्दीत ‘बीट मार्शल’ नेमके कुठे होते?
• पोलिसांची ‘पेट्रोलिंग व्हॅन’ केवळ कागदावरच फिरते की काय?
• शहरातील या प्रमुख मार्गावर रात्रीच्या वेळी जर पोलिस गस्त घालत नसतील, तर सामान्य नागरिक सुरक्षित कसे राहतील?

तालुका पोलिसांनी जर त्यांच्या हद्दीतील संवेदनशील ठिकाणी रात्रीची गस्त व ‘बीट मार्शल’ची व्यवस्था चोख ठेवली असती, तर लुटारूंनी एवढा मोठा गुन्हा करण्याचे धाडस केले नसते. पोलिसांच्या ढिसाळपणामुळेच गुन्हेगारांचे मनोबल वाढत असल्याची टीका आता नागरिक करत आहेत.

मोठा प्रश्न: तालुका पोलिसांना या गुन्ह्यात ‘यश’ मिळणार का?

एकीकडे हद्दीचा वाद आणि दुसरीकडे गस्तीचा अभाव यामुळे तालुका पोलिसांची नाचक्की झालेली असताना, या अत्यंत गंभीर गुन्ह्यात लुटारूंना पकडण्यात पोलिसांना यश मिळणार का, हा सर्वात मोठा प्रश्न आहे.

• गुन्हा ‘पाळत ठेवून’ केला गेल्याचा प्राथमिक अंदाज असल्याने, आरोपींना शोधण्यासाठी स्थानिक माहिती (Local Intelligence) चा कस लागणार आहे.
• सीसीटीव्ही फुटेजमध्ये आरोपींचे चेहरे स्पष्ट दिसत नसल्याने, केवळ वर्णनावरून किंवा रेकॉर्डवरील गुन्हेगारांच्या माहितीवरून तपास करणे पोलिसांसाठी मोठे आव्हान असणार आहे.
• एवढ्या मोठ्या रकमेची लूट करणारे आरोपी लवकर शहरातून पसार होण्याची शक्यता अधिक असल्याने, पोलिस यंत्रणा किती जलद गतीने तपास करते, यावरच यशापयश अवलंबून आहे.

भुसावळ पोलिसांच्या कार्यक्षमतेची आता खरी कसोटी लागणार आहे. तातडीने तपास करून आरोपींना बेड्या ठोकल्या नाहीत, तर शहरात अशा प्रकारच्या गुन्हेगारी घटना वाढण्याची भीती आहे.

नेमके काय घडले? मोहंमद यासिन हे मुन्ना तेली यांच्याकडील बँकिंगचे व्यवहार सांभाळतात. मंगळवारी दैनंदिन व्यवहारातून जमा झालेली २५ लाख ४२ हजार रुपयांची रोख रक्कम एका पिशवीत घेऊन ते रात्री सुमारे १०.३० वाजता आपल्या दुचाकीवरून घराकडे निघाले होते. ते खडकारोडवरून सत्यसाई नगरकडे वळताच, समोर असलेल्या दोन अनोळखी व्यक्तींनी त्यांच्या दुचाकीला जोरात धक्का दिला. यासिन खाली कोसळताच, तिसऱ्या व्यक्तीने संधी साधून त्यांच्या हातातील पैशाची पिशवी जबरदस्तीने हिसकावली. प्रतिकार करूनही लुटारूंनी पिशवी घेऊन दुचाकीवरून अंधारात पळ काढला.

तासभर चालला ‘हद्दीचा वाद’! पोलिसांच्या कार्यक्षमतेवर मोठे प्रश्नचिन्ह

एकीकडे भररस्त्यात २५ लाख रुपयांची जबर लूट होऊन शहरात खळबळ उडालेली असताना, दुसरीकडे मात्र, गुन्हा नेमका कोणत्या पोलिस ठाण्याच्या हद्दीत झाला? यावरून तालुका पोलिस आणि बाजारपेठ पोलिस ठाण्यांमध्ये सुमारे तासभर ‘खल’ चालला! दोन्ही ठाण्यांचे अधिकारी एकमेकांना हद्दीचा दाखला देत होते. अखेर, घटनेचे गांभीर्य लक्षात घेऊन आणि घटनास्थळ तालुका पोलिस ठाणे हद्दीत असल्याचा निष्कर्ष निघाल्यानंतर रात्री उशिराने गुन्हा दाखल करण्यात आला.

गुन्हा दाखल होण्यापूर्वीच तासभर हद्दीवरून चाललेला हा वाद आणि तालुका पोलिसांकडून अपेक्षित असलेल्या रात्रीच्या गस्तीचा अभाव, भुसावळ तालुका पोलिस प्रशासनाच्या कार्यक्षमतेवर मोठे प्रश्नचिन्ह निर्माण करतो!

तपास यंत्रणा कामाला;   या घटनेनंतर भुसावळ येथील कर्तव्यदक्ष डीवायएसपी संदीप गावीत साहेब , बाजारपेठचे निरीक्षक राहुल वाघ, एलसीबीचे राहुल गायकवाड आणि तालुका पोलिस ठाण्याचे निरीक्षक महेश गायकवाड यांनी घटनास्थळी धाव घेतली. तसेच श्वान पथकाकडून चोरट्यांच्या पळण्याच्या मार्गाचा माग काढण्याचा प्रयत्न केला गेला. पोलिसांनी खडका ग्रामपंचायत हद्दीतील सीसीटीव्ही कॅमेऱ्यांची तपासणी सुरू केली आहे. डॉ. बाबासाहेब आंबेडकर पुतळ्याजवळच्या फुटेजमध्ये तीन संशयित दुचाकीवरून जाताना दिसले असले तरी, त्यांचे चेहरे स्पष्ट नाहीत. पोलिसांनी प्राप्त वर्णनावरून आरोपींचा शोध सुरू केला आहे.

या गंभीर घटनेची माहिती घेण्यासाठी  संबंधित पोलिस निरीक्षकांना संपर्क साधण्याचा प्रयत्न केला गेला, मात्र, मेसेज पाहूनही त्यांनी कोणतेही उत्तर दिले नाही. २५ लाखांच्या रस्तालुटीसारख्या घटनेत, पोलिसांकडून अपेक्षित असलेला तातडीचा प्रतिसाद आणि पारदर्शकता यात मोठी उणीव दिसत आहे.

शहरातील वाढत्या गुन्हेगारीवर नियंत्रण मिळवण्यासाठी, तालुका पोलिसांनी गस्त वाढवून, तसेच तातडीने तपास करून आरोपींना पकडणे अत्यंत गरजेचे आहे.