जळगाव एमआयडीसी पोलिसांची तत्पर कामगिरी; गॅस सिलिंडर चोरीचा गुन्हा ७२ तासांत उघड

जळगाव: एमआयडीसी परिसरातून भारत पेट्रोलियमचे भरलेले गॅस सिलिंडर चोरीला गेल्याची घटना नुकतीच उघडकीस आली होती. या गुन्ह्याचा अत्यंत वेगाने तपास करत एमआयडीसी पोलिसांनी ६१ चोरीचे सिलिंडर आणि गुन्ह्यात वापरलेले आयशर वाहन असा एकूण मुद्देमाल हस्तगत केला आहे. या प्रकरणी नशिराबाद आणि उस्मानिया पार्क येथील दोन संशयितांना अटक करण्यात आली आहे.

नेमकी घटना काय?

फिर्यादी यांनी १४ नोव्हेंबर २०२५ रोजी भारत पेट्रोलियम (जळगाव) येथून ३४२ नग गॅस सिलिंडरने भरलेला ट्रक एमआयडीसी परिसरात पार्किंगमध्ये लावला होता. दिनांक १५ नोव्हेंबर २०२५ रोजी सकाळी फिर्यादी वाहन घेण्यासाठी आले असता, त्यांना वाहन मूळ जागी आढळून आले नाही. त्यांनी आजूबाजूला शोध घेतला असता, सदर वाहन रस्त्याच्या कडेला उभे असल्याचे दिसले. मात्र, वाहनातील साठ्याची पाहणी केली असता, ३४२ पैकी ६१ गॅस सिलिंडर गायब असल्याचे निदर्शनास आले. याप्रकरणी एमआयडीसी पोलीस ठाण्यात भारतीय न्याय संहिता (BNS) २०२३ चे कलम ३०३ (२) अन्वये गुन्हा (रजिस्टर नंबर ८४८/२०२५) दाखल करण्यात आला होता.

तपास आणि अटकेची कारवाई

गुन्ह्याचे गांभीर्य ओळखून पोलीस निरीक्षक बबन आव्हाड यांनी गुन्हे शोध पथकाला तात्काळ तपासाच्या सूचना दिल्या होत्या. गुप्त बातमीदारांकडून मिळालेल्या माहितीच्या आधारे पोलिसांनी सापळा रचला. दिनांक १८ नोव्हेंबर २०२५ रोजी एमआयडीसी भागात संशयित शेख फिरोज शेख याकूब (रा. नशिराबाद, जळगाव) याला शिताफीने ताब्यात घेतले.

पोलिसांनी त्याला विश्वासात घेऊन कसून चौकशी केली असता, त्याने गुन्ह्याची कबुली दिली. तसेच, हा गुन्हा त्याचा साथीदार सय्यद मुश्ताक सय्यद अशपाक (रा. उस्मानिया पार्क, जळगाव) याच्या मदतीने केल्याचे सांगितले.

हस्तगत मुद्देमाल

पोलिसांनी या कारवाईत चोरीला गेलेले १ लाख २२ हजार रुपये किमतीचे ६१ नग गॅस सिलिंडर (हंड्या) जप्त केले आहेत. तसेच, चोरीसाठी वापरलेले सुमारे ५ लाख रुपये किमतीचे आयशर वाहन देखील पोलिसांनी जप्त केले आहे.

पोलिस पथकाची कामगिरी

ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि पोलीस निरीक्षक बबन आव्हाड यांच्या मार्गदर्शनाखाली करण्यात आली.

गुन्हे शोध पथकाचे पोलीस उपनिरीक्षक (PSI) राहुल तायडे, पोलीस उपनिरीक्षक चंद्रकांत धनके, सहाय्यक फौजदार (ASI) विजयसिंग पाटील, पोलीस हेड कॉन्स्टेबल (HC) गणेश शिरसाळे, प्रदीप चौधरी, गिरीश पाटील, प्रमोद लाडवंजारी, किरण चौधरी तसेच पोलीस नाईक/कॉन्स्टेबल नितीन ठाकूर, किरण पाटील आणि शशिकांत मराठे यांनी या कारवाईत सहभाग घेतला.