अमळनेर । विशेष प्रतिनिधी । येथील आगामी नगरपालिका निवडणुकीच्या पार्श्वभूमीवर राजकीय वातावरण तापू लागले असून, प्रभाग क्रमांक १४ ‘अ’ मध्ये विकासाच्या मुद्द्यावर भर दिला जात आहे. शिवसेनेच्या (शिंदे गट) वतीने आणि अधिकृत ‘धनुष्यबाण’ चिन्हावर निवडणूक लढविणाऱ्या उमेदवार सौ. ज्योती पंकज शेटे यांनी आज प्रभागाचा सर्वांगीण आणि वास्तववादी विकास आराखडा (मॅनिफेस्टो) जाहीर केला. केवळ आश्वासने न देता मूलभूत सुविधा, महिला सक्षमीकरण, तरुणांना रोजगार आणि पारदर्शक कारभार अशा १० प्रमुख क्षेत्रांवर (दशसूत्री) आधारित हा आराखडा असल्याने मतदारांमध्ये उत्सुकता निर्माण झाली आहे.
पायाभूत सुविधा आणि पाण्याचे नियोजन
प्रभागातील प्रत्येक नागरिकाला भेडसावणारा पाणीपुरवठ्याचा प्रश्न सोडवण्यासाठी सौ. शेटे यांनी विशेष कृती आराखडा मांडला आहे. प्रभागातील प्रत्येक गल्लीपर्यंत स्वच्छ पिण्याचे पाणी नियमित आणि वेळेवर उपलब्ध करून देणे, हे त्यांचे पहिले उद्दिष्ट आहे. जुन्या आणि गळक्या पाईपलाईन बदलून नवीन पाईपलाईन टाकणे आणि नळजोडणीच्या तक्रारींसाठी ‘डिजिटल नोंदणी’ व जलद निवारण प्रणाली राबवण्यात येईल, असे त्यांनी स्पष्ट केले.
रस्ते विकासाबाबत बोलताना त्या म्हणाल्या की, “पावसाळ्यात नागरिकांचे होणारे हाल थांबवण्यासाठी जुन्या रस्त्यांचे काँक्रीटीकरण आणि डांबरीकरण केले जाईल. नवीन ड्रेनेज लाईन टाकून सांडपाण्याची विल्हेवाट लावणे आणि गटारींच्या नियमित साफसफाईसह झाकणांची व्यवस्था करणे याला माझे प्राधान्य असेल.”
‘स्वच्छ व सुरक्षित प्रभाग’ संकल्पना
“स्वच्छ प्रभाग – सुंदर प्रभाग” या धर्तीवर कचरा मुक्त प्रभागाची संकल्पना त्यांनी मांडली आहे. यासाठी दररोज कचरा गाडीची फेरी, सार्वजनिक ठिकाणी डस्टबिनची व्यवस्था आणि परिसर कुत्रामुक्त करण्यासाठी विशेष उपक्रम राबवले जातील. सुरक्षेच्या दृष्टीने सर्व गल्लीबोळात नवीन LED स्ट्रीटलाईट बसवणे, खराब दिवे २४ तासांत बदलण्याची यंत्रणा आणि प्रमुख चौकांमध्ये CCTV कॅमेरे बसवण्याची योजना त्यांनी जाहीर केली आहे.
महिला, युवक आणि ज्येष्ठांसाठी विशेष तरतुदी
सामाजिक विकासाचा समतोल साधत, सौ. शेटे यांनी महिलांसाठी ‘सुरक्षा हेल्पडेस्क’ आणि स्वयंसहाय्यता गटांना प्रशिक्षण व कर्ज उपलब्ध करून देण्याचे आश्वासन दिले आहे. तरुणांसाठी स्किल डेव्हलपमेंट (संगणक, डिजिटल मार्केटिंग), क्रीडा साहित्य, स्पर्धा परीक्षा मार्गदर्शन आणि स्थानिक रोजगार निर्मितीवर भर दिला जाईल. तसेच, वयोवृद्धांसाठी आरोग्य शिबिरे आणि शासकीय योजनांसाठी (पेन्शन, आधार, रेशन) प्रभागातच ‘मदत कक्ष’ सुरू केला जाईल.
पारदर्शकतेची हमी
प्रशासकीय कारभारात उत्तरदायित्व असावे, यासाठी सौ. शेटे यांनी ‘ओपन डोअर पॉलिसी’ स्वीकारली आहे. त्या म्हणाल्या, “कारभारात पारदर्शकता ही माझी प्राथमिकता आहे. मी दर तीन महिन्यांनी कामाचा अहवाल जनतेसमोर मांडेन आणि भ्रष्टाचारमुक्त दर्जेदार काम करण्याची शपथ घेते.”
पर्यावरण संवर्धनासाठी रेन वॉटर हार्वेस्टिंग आणि वृक्षारोपण यांसारखे उपक्रमही या आराखड्यात समाविष्ट आहेत.
मतदारांना भावनिक साद
आपल्या विकास आराखड्याचा समारोप करताना सौ. ज्योती शेटे यांनी मतदारांना आवाहन केले, “तुमचे एक मत हा माझ्यासाठी केवळ कागदाचा तुकडा नसून तो विश्वासाचा करार आहे. प्रभाग १४ ‘अ’ च्या सर्वांगीण विकासासाठी मी मनापासून व प्रामाणिकपणे काम करीन.
सौ. ज्योती शेटे यांचा ‘दशसूत्री’ वचननामा
१. पाणीपुरवठा: स्वच्छ पाणी, नवीन पाईपलाईन आणि तक्रारींचे डिजिटल निवारण.
२. रस्ते व ड्रेनेज: रस्त्यांचे काँक्रीटीकरण, नवीन ड्रेनेज लाईन आणि नियमित गटार सफाई.
३. स्वच्छता: ‘स्वच्छ प्रभाग-सुंदर प्रभाग’, नियमित कचरा गाडी आणि सार्वजनिक डस्टबिन.
४. सुरक्षा: गल्लीबोळात LED दिवे, २४ तासांत दुरुस्ती आणि CCTV कॅमेरे.
५. महिला सक्षमीकरण: महिला हेल्पडेस्क, बचत गटांना कर्ज/स्टॉल आणि आरोग्य शिबिरे.
६. युवा विकास: स्किल डेव्हलपमेंट (Skill Development), क्रीडांगण आणि करिअर काउन्सेलिंग.
७. ज्येष्ठ नागरिक: आरोग्य तपासणी आणि शासकीय योजनांसाठी मार्गदर्शन केंद्र.
८. पर्यावरण: रेन वॉटर हार्वेस्टिंग (Rain Water Harvesting), वृक्षारोपण आणि जलनिकासी.
९. सांस्कृतिक: सण समित्यांना मदत, योगा वर्ग आणि युवा मंचाची स्थापना.
१०. पारदर्शकता: दर ३ महिन्यांनी कामाचा अहवाल (Progress Report) आणि भ्रष्टाचारमुक्त सेवा.
