जळगाव महापालिका रणसंग्राम: प्रभाग १३ मध्ये ‘गुरु-शिष्या’च्या लढतीची चर्चा; मुविकोराज कोल्हेंच्या दावेदारीने राजकीय वातावरण तापले!

जळगाव: जळगाव शहर महानगरपालिका निवडणुकीचे बिगुल वाजताच शहरातील राजकीय वातावरण चांगलेच तापले आहे. प्रत्येक प्रभागात इच्छुकांची गर्दी उसळली असली तरी, संपूर्ण शहराचे लक्ष वेधून घेतले आहे ते प्रभाग क्रमांक १३ ने. या प्रभागात भारतीय जनता पार्टीकडून (भाजप) युवा नेते मुविकोराज कोल्हे यांनी उमेदवारीसाठी जोरदार फिल्डिंग लावली असून, त्यांनी पक्षातर्फे मुलाखतही दिली आहे. मात्र, या प्रभागात ‘गुरु विरुद्ध शिष्य’ असा सामाना रंगण्याची चिन्हे असल्याने राजकीय वर्तुळात खळबळ उडाली आहे.

मुविकोराज कोल्हे यांची प्रबळ दावेदारी प्रभाग क्रमांक १३ मध्ये मुविकोराज कोल्हे हे एक प्रमुख आणि चर्चेतील नाव म्हणून समोर आले आहे. त्यांनी भाजपच्या निरीक्षकांसमोर दिलेल्या मुलाखतीत आपल्या कामाचा लेखाजोखा आणि प्रभागातील जनसंपर्काचा दाखला देत उमेदवारीवर प्रबळ दावा सांगितला आहे. तरुण चेहरा आणि आक्रमक कार्यपद्धती यामुळे कोल्हे यांचे नाव आघाडीवर असल्याचे बोलले जात आहे.

गुरु-शिष्याच्या लढतीकडे शहराचे लक्ष सर्वात रंजक आणि उत्कंठावर्धक बाब म्हणजे, या प्रभागात गुरु आणि शिष्यामध्ये थेट लढत होण्याची शक्यता वर्तवली जात आहे. सूत्रांनी दिलेल्या माहितीनुसार, ज्यांच्याकडून राजकारणाचे धडे गिरवले किंवा ज्यांना राजकीय गुरु मानले जाते, अशा दिग्गजांसोबतच मुविकोराज कोल्हे यांना दोन हात करावे लागण्याची शक्यता आहे. जर ही लढत झाली, तर ती केवळ राजकीय नसून प्रतिष्ठेची ठरणार आहे.

 एकीकडे मुविकोराज कोल्हे यांच्यासारखा उत्साही आणि महत्त्वाकांक्षी चेहरा, तर दुसरीकडे अनुभवी नेतृत्व, यामुळे भाजप पक्षश्रेष्ठींसमोर उमेदवारी देताना मोठा पेच निर्माण झाला आहे. प्रभाग १३ मधील ही लढत ‘काटे की टक्कर’ होणार हे निश्चित मानले जात आहे.

“प्रभागात विकास कामांना गती देणारा उमेदवार हवा की जुन्या जानत्या नेतृत्वावर विश्वास ठेवायचा?” यावर सध्या प्रभाग १३ मधील कट्ट्यांवर आणि चौकाचौकात चर्चा रंगल्या आहेत. गुरु-शिष्याच्या या संभाव्य लढतीत कोण बाजी मारणार आणि भाजप कोणाच्या गळ्यात उमेदवारीची माळ टाकणार, याकडे आता संपूर्ण जळगावचे लक्ष लागले आहे.