जळगाव | प्रतिनिधी जळगाव महानगरपालिका निवडणुकीत भारतीय जनता पक्षाने आपली ताकद दाखवत प्रभाग क्रमांक १२ ब मधून उज्वला बेंडाळे यांची बिनविरोध निवड निश्चित केली आहे. उमेदवारी अर्ज मागे घेण्याच्या अंतिम दिवशी कोणताही विरोधी उमेदवार रिंगणात न राहिल्याने उज्वला बेंडाळे यांची निवड अधिकृतपणे बिनविरोध घोषित करण्यात आली.
प्रभाग क्रमांक १२ ब मध्ये सुरुवातीपासूनच भाजपकडून उज्वला बेंडाळे यांचे नाव आघाडीवर होते. स्थानिक पातळीवर सामाजिक काम, पक्षाशी असलेली निष्ठा आणि संघटनात्मक ताकद यामुळे त्यांना प्रभागातील मतदारांचा मोठा पाठिंबा मिळाल्याचे दिसून आले. विरोधी पक्षांनी उमेदवार न उभा केल्याने किंवा अर्ज मागे घेतल्याने भाजपचा हा विजय अधिक ठळक ठरला आहे.
या बिनविरोध निवडीमुळे भाजपच्या गोटात आनंदाचे वातावरण असून, कार्यकर्त्यांनी एकमेकांचे अभिनंदन करत जल्लोष साजरा केला. भाजप नेत्यांनीही ही निवड म्हणजे पक्षाच्या विकासात्मक कामांवर आणि नेतृत्वावर मतदारांनी टाकलेला विश्वास असल्याची प्रतिक्रिया दिली आहे.
उज्वला बेंडाळे यांनी बिनविरोध निवड झाल्यानंतर प्रतिक्रिया देताना म्हटले की, “प्रभाग क्रमांक १२ ब मधील नागरिकांनी दाखवलेला विश्वास ही मोठी जबाबदारी आहे. सर्वसामान्य नागरिकांच्या समस्या सोडवणे, मूलभूत सुविधा, स्वच्छता, रस्ते, पाणीपुरवठा आणि महिलांसाठी विशेष उपक्रम राबवणे हे माझे प्राधान्य असेल.”
जळगाव महानगरपालिका निवडणुकीत भाजपकडून एकामागून एक प्रभागांमध्ये आघाडी घेतली जात असून, प्रभाग क्रमांक १२ मधील ही बिनविरोध निवड भाजपसाठी मनोबल वाढवणारी ठरली आहे. येत्या निवडणुकीत भाजपची पकड अधिक मजबूत होत असल्याचे चित्र सध्या शहराच्या राजकारणात स्पष्टपणे दिसून येत आहे.
