जळगाव मनपा रणसंग्राम: प्रभाग १३ मध्ये ‘महायुती’चा एल्गार!

जळगाव (विशेष प्रतिनिधी): जळगाव महानगरपालिकेच्या आगामी सार्वत्रिक निवडणुकीच्या निमित्ताने शहरातील राजकीय वातावरण आता शिगेला पोहोचले आहे. उमेदवारी अर्ज दाखल झाल्यानंतर आता खऱ्या अर्थाने प्रचाराची रणधुमाळी सुरू झाली असून, प्रभाग क्रमांक १३ मध्ये महायुतीने आज प्रचाराचा जोरदार शुभारंभ केला. महायुतीचे अधिकृत उमेदवार आणि माजी मंत्री गुलाबराव देवकर यांचे सुपुत्र प्रफुल देवकर यांच्या प्रचाराचा श्रीगणेशा आज मोठ्या उत्साहात पार पडला.

रायसोनी नगरात दुमदुमला ‘हर हर महादेव’चा नाद प्रफुल देवकर यांच्या प्रचाराचा शुभारंभ जळगाव शहरातील रायसोनी नगर येथील जागृत महादेव मंदिरात करण्यात आला. यावेळी जळगाव शहराचे आमदार सुरेश (राजूमामा) भोळे यांच्या प्रमुख उपस्थितीत महादेवाची विधिवत महाआरती करण्यात आली. आमदार भोळे यांच्या हस्ते श्रीफळ वाढवून (नारळ फोडून) प्रचाराचे अधिकृत रणशिंग फुकण्यात आले. यावेळी उपस्थित शेकडो कार्यकर्ते आणि पदाधिकाऱ्यांनी दिलेल्या ‘हर हर महादेव’ आणि ‘महायुतीचा विजय असो’ या घोषणांनी संपूर्ण मंदिर परिसर आणि रायसोनी नगर दुमदुमून गेले होते.

विकासाचा नवा अध्याय लिहिणार: प्रफुल देवकर महादेवाच्या चरणी नतमस्तक झाल्यानंतर आपल्या भावना व्यक्त करताना प्रफुल देवकर म्हणाले की, “देवकर कुटुंबाने नेहमीच समाजकारण आणि विकासाला प्राधान्य दिले आहे. आज महायुतीच्या माध्यमातून आणि जनतेच्या आशीर्वादाने आम्ही विकासाचा एक नवा अध्याय सुरू करण्यास सज्ज आहोत. प्रभागातील समस्या सोडवून जनतेला अपेक्षित असलेला विकास देण्यासाठी मी कटिबद्ध आहे.”

महायुतीचे शक्तिप्रदर्शन प्रभाग क्रमांक १३ हा राजकीयदृष्ट्या अत्यंत संवेदनशील आणि महत्त्वाचा मानला जातो. या ठिकाणी माजी मंत्री गुलाबराव देवकर यांचा राजकीय वारसा आणि महायुतीची ताकद असा दुहेरी मिलाफ पाहायला मिळत आहे. आजच्या शुभारंभ प्रसंगी महायुतीचे विविध पदाधिकारी, भाजप, शिवसेना आणि राष्ट्रवादी काँग्रेसचे (महायुती) स्थानिक नेते, युवा कार्यकर्ते आणि प्रभागातील ज्येष्ठ नागरिक, महिला भगिनी मोठ्या संख्येने उपस्थित होत्या.

निवडणुकीच्या या सुरुवातीच्या टप्प्यातच महाआरती आणि शक्तिप्रदर्शनाद्वारे महायुतीने विरोधकांना एक प्रकारे इशाराच दिला असून, प्रभाग १३ मधील लढत आता लक्षवेधी ठरणार आहे.