जळगाव जिल्ह्यात वाढत्या प्राणांतिक अपघातांची पोलिसांकडून गंभीर दखल

​जळगाव: जळगाव जिल्ह्यात सातत्याने होत असलेल्या प्राणांतिक (जीवघेण्या) अपघातांच्या पार्श्वभूमीवर आज पोलिस प्रशासनाची एक महत्त्वपूर्ण आढावा बैठक पार पडली. या बैठकीत अपघातांची वाढती आकडेवारी, डार्क स्पॉट्सची स्थिती आणि शहरातील वाहतूक समस्यांवर सविस्तर चर्चा करण्यात आली. तसेच, अपघातांचे प्रमाण कमी करण्यासाठी विविध विभागांच्या समन्वयातून ग्राउंड लेव्हलवर तातडीने उपाययोजना राबविण्याचा निर्णय घेण्यात आला आहे.

बैठकीत सादर करण्यात आलेल्या आकडेवारीनुसार, २०२४ मध्ये जिल्ह्यात अपघातात ४७२ जणांना जीव गमवावा लागला होता. तर २०२५ मध्ये हे प्रमाण ४४५ वर आले होते (यात ६ टक्के घट नोंदवली गेली होती). ही एक सकारात्मक बाब असली तरी, चालू वर्षी म्हणजेच २०२६ मध्ये मार्च महिन्यापर्यंतच अपघाती मृत्यूंचा आकडा १०० वर पोहोचला आहे. विशेष चिंतेची बाब म्हणजे, २०२५ च्या सुरुवातीच्या महिन्यांच्या तुलनेत २०२६ मध्ये आतापर्यंत २६ अपघात अधिक झाले आहेत.

​महासंचालकांचे कडक निर्देश; १०% मृत्यू कमी करण्याचे उद्दिष्ट

राज्याचे पोलिस महासंचालक यांनी राज्यातील प्राणांतिक अपघात कमी करण्याबाबत कडक निर्देश दिले आहेत. ३ एप्रिल रोजी नागपूर येथे सर्व अप्पर पोलिस अधीक्षकांसोबत झालेल्या बैठकीत त्यांनी सविस्तर मार्गदर्शन केले होते. त्यानुसार, जळगाव जिल्ह्यात २०२६ या वर्षात अपघाती मृत्यूंचे प्रमाण किमान १० टक्क्यांनी कमी करण्याचे उद्दिष्ट ठेवण्यात आले आहे.

​पोलिस प्रशासनाचा ‘ॲक्शन प्लॅन’

हे उद्दिष्ट साध्य करण्यासाठी पोलिसांनी एक कृती आराखडा तयार केला आहे:

​सखोल विश्लेषण: प्रत्येक पोलिस स्टेशनच्या प्रभारी अधिकाऱ्याने २०२४ आणि २०२५ मधील अपघात स्थळांना प्रत्यक्ष भेट द्यावी. प्रत्येक अपघाताचे सखोल विश्लेषण करून त्याची नेमकी कारणे शोधावीत, असे आदेश देण्यात आले आहेत.

​विभागीय समन्वय: रस्ते बांधणीतील त्रुटी दूर करण्यासाठी राष्ट्रीय महामार्ग प्राधिकरण (NHAI), सार्वजनिक बांधकाम विभाग (PWD) आणि जळगाव महानगरपालिका (NMC) यांच्याशी तातडीने समन्वय साधला जाणार आहे. या सर्व विभागांना पुढील २ दिवसांत त्रुटी दूर करण्याबाबत सविस्तर पत्रव्यवहार केला जाईल.

​डार्क स्पॉट्स आणि स्ट्रक्चरल बदल: अपघातांना निमंत्रण देणारे ‘डार्क स्पॉट्स’ शोधून तिथे तातडीने स्ट्रक्चरल बदल (रस्ते दुरुस्ती, सिग्नल व्यवस्था, स्पीड कंट्रोलर) करण्यावर विशेष भर दिला जाणार आहे.

​जागृती आणि कडक कारवाई

​ट्रक चालकांसाठी कार्यशाळा: जळगाव, भुसावळ आणि चाळीसगाव येथील एमआयडीसी (MIDC) परिसरामध्ये जड वाहनांच्या (ट्रक) चालकांसाठी विशेष रस्ता सुरक्षा कार्यशाळा आयोजित केल्या जातील.

​ड्रंक अँड ड्राईव्हवर कारवाई: मद्यपान करून वाहन चालविणाऱ्यांवर आता दररोज कठोर कारवाई मोहीम राबविली जाणार आहे.

​या मोहिमेत स्वयंसेवी संस्थांचा (NGOs) सहभाग वाढवून जनजागृती केली जाईल.

​महामार्गांवरील ढाबेचालक बनणार ‘फर्स्ट रिस्पॉन्डर’

अपघातानंतर जखमींना त्वरित मदत मिळावी यासाठी एक नाविन्यपूर्ण पाऊल उचलण्यात आले आहे. हायवेवरील अपघातांच्या ‘हॉटस्पॉट’ जवळ असलेल्या ढाबे आणि हॉटेल्सच्या मालकांना/कर्मचाऱ्यांना ‘अपघात प्रतिसाद प्रशिक्षण’ (Accident Response Training) दिले जाणार आहे. जेणेकरून वैद्यकीय मदत मिळेपर्यंत ते जखमींना प्राथमिक मदत करू शकतील. तसेच, प्रत्येक पोलिस स्टेशन आणि पोलिसांच्या गस्ती वाहनात ‘प्रथमोपचार पेटी’ (First Aid Kit) असणे अनिवार्य करण्यात आले आहे.

अपघात कमी करण्यात पोलिसांना यश आले होते, मात्र २०२६ मधील वाढती प्रवृत्ती प्रशासनासाठी धोक्याचा इशारा आहे. त्यामुळे आता सर्व संबंधित विभागांच्या समन्वयातून आणि नागरिकांच्या सहकार्यातून अपघातांचे प्रमाण १० टक्क्यांनी खाली आणण्यासाठी पोलिस दल सज्ज झाले आहे.